អ្នកបើក Range Rover ពាក់ផ្លាកលេខភ្នំពេញ 2AF-7777 បុកនិស្សិតស្រី ឌុំ រីដា ត្រូវបានលាតត្រដាងហើយ

ភ្នំពេញ៖ មហាជនទូទាំងប្រទេសចង់ដឹង ចង់ឮ ចង់ស្គាល់ តើអ្នកបើករថយន្តបង្ក Range Rover ពាក់ផ្លាកលេខភ្នំពេញ 2AF-7777 បុកនិស្សិតស្រី ឌុំ រីដា ជានរណា? ពេលនេះត្រូវបានលាតត្រដាងហើយ។

អ្នកបើករថយន្តបង្កដែលអ្នកលេងតាមបណ្តាញសង្គម Facebook ចង់ឲ្យមកទទួលទោសតាមច្បាប់នោះ គឺជានារីវ័យក្មេងម្នាក់ឈ្មោះ យិន ម៉ាណា អាយុ១៧ឆ្នាំ ជាកូនស្រីរបស់លោក យិន ង្គិច ដែលបានចូលទៅបំភ្លឺនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ កាលពីម្សិលមិញ (ថ្ងៃទី២៧ ខែមីនា) ដោយមកទទួលខុសត្រូវទាំងស្រុង ចំពោះគ្រោះថ្នាក់ចរាចរណ៍មួយនេះ។ 

នៅចំពោះសមត្ថកិច្ចចរាចរណ៍ លោក យិន ង្គិច បានយល់ព្រមសារភាពថា «អ្នកបើករថយន្តនោះជាកូនស្រីរបស់ខ្លួនពិតប្រាកដមែន ហើយលោកក៏បានយល់ព្រមផ្តិតមដៃនៅលើកិច្ចសន្យាផងដែរ»។