ក្រុមការងារ USFS សហរដ្ឋអាមេរិក ជួយបណ្តុះបណ្តាលមន្រ្តីឧទ្យានុរក្សកម្ពុជា

ភ្នំពេញ៖ នាព្រឹកថ្ងៃទី២៤ ខែមេសា ឆ្នាំ២០១៨ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានអនុញ្ញាតឱ្យក្រុមការងារ USFS (US Forest Service) ចូលជួបសំដែងការគួសម និងសំណេះសំណាលលើកិច្ចសហប្រតិបត្តិការ ពង្រឹងសមត្ថភាពដល់មន្រ្តីឧទ្យានុរក្ស  នៅទីស្តីការ ក្រសួងបរិស្ថាន។

នៅក្នុងជំនួបនេះដែរ តំណាងក្រុមការងារ USFS បានលើកឡើងពីកិច្ចសហប្រតិបត្តិការរវាង USFS នឹងអគ្គនាយកដ្ឋានរដ្ឋបាលការពារ និងអភិរក្សធម្មជាតិ នៃក្រសួងបរិស្ថាន លើការរៀបចំគម្រោងវគ្គបណ្តុះបណ្តាលដល់មន្រ្តីឧទ្យានុរក្ស ក្រោមប្រធានបទ«បណ្តុះបណ្តាលបមានីយកម្មដល់មន្រ្តីឧទ្យានុរក្សក្នុងតំបន់ការពារធម្មជាតិ លើការងារបច្ចេកទេសល្បាត»។ សូមបញ្ជាក់ថាគម្រោងនេះមានរយៈពេល១៨ខែ ដោយមានការគាំទ្រថវិការពីក្រសួងការបរទេសរបស់សហរដ្ឋអាមេរិក។

នាឱកាសនេះ ឯកឧត្តមរដ្ឋមន្រ្តី បានគាំទ្រ និងជំរុញឱ្យកិច្ចសហប្រតិបត្តិការរួមចំណែកបង្កើនចំណេះដឹង ជំនាញបន្ថែមដល់មន្រ្តីឧទ្យានុរក្ស ដើម្បីទទួលបានប្រសិទ្ធភាពការងារ នៅក្នុងការចូលរួមថែរក្សា ការពារធនធានធម្មជាតិ ក៏ដូចជាទប់ស្កាត់បាននូវបទល្មើសផ្សេងៗ ដើម្បីការអភិវឌ្ឍន៍ប្រកបដោយចិរភាព។

រាយការណ៍ជូនដោយ៖ ម៉ារត្ន័